എഴുത്തിന്റെ ശക്തി അപാരമാണ്. മേഘങ്ങൾ മഴയെ എന്നപോലെ മനുഷ്യമനസ്സുകളിൽ ആശയങ്ങളുടെ പെരുമഴയായി പെയ്തു സംസ്കാരങ്ങളുടെ ഗതിവിഗതികളെ തിട്ടപ്പെടുത്തുന്നതിൽ എഴുത്തിനോളം പങ്കുവഹിച്ച മറ്റൊന്നും മനുഷ്യ ചരിത്രത്തിൽ ഇല്ല . കൽ മൺ ഫലകങ്ങളിൽ തുടങ്ങി പപ്പൈറസിലൂടെ പേപ്പർ ആയി പരിണമിച്ചു ഇന്ന് ഡിജിറ്റൽ പ്ലാറ്റ്ഫോമിൽ എത്തി നിൽക്കുമ്പോൾ മാറ്റം വന്നത് എഴുത്തിനല്ല അതിന്റെ മാധ്യമങ്ങൾക്ക് മാത്രമാണ്. അതുകൊണ്ട് തന്നെ എഴുത്തിന്റെ വിശാല ലോകത്ത് ചെറിയൊരു ഒരു ക്രിസ്തീയ സ്വാധീനമായി ഒരു ദശാബ്ദമായി നിലനിൽക്കുന്ന വഴിയും സത്യവും മാസിക ഓൺലൈൻ പോർട്ടൽ ആയി വേഷം മാറുന്നത് തികച്ചും കാലാനുസൃതം ആണ് .
ക്രിസ്തീയത ജീവിതത്തെ അർത്ഥപൂർണ്ണമാക്കുന്ന ക്രിസ്തു കേന്ദ്രീകൃതമായ ഒരു ലോകവീക്ഷണം ആണ്. ക്രിസ്തുവിനോടുള്ള ആത്മബന്ധം ഫലത്തിൽ ആ ലോകവീക്ഷണത്തോട് ഉള്ള അനുരൂപപ്പെടലും തൽഫലമായ ജീവിതപരിവർത്തനവും ആണ്. വിഭിന്നങ്ങളും വിചിത്രങ്ങളുമായ ചിന്താധാരകളുടെ വിൽപന സ്ഥലമായ ലോകത്തിൽ സമഗ്രവും യുക്തിഭദ്രവുമായ ക്രൈസ്തവമാർഗ്ഗത്തിന്റെ ആത്മ ശക്തിയാൽ ഉള്ള പ്രഘോഷണമാണ് ദൈവസഭയുടെ എക്കാലത്തെയും ദൗത്യം. ആ ദൗത്യത്തിൽ ഒരു ആനുകാലിക പങ്കാളിത്തം, അതാണ് വഴിയും സത്യവും ഓൺലൈൻ പോർട്ടൽ ലക്ഷ്യമിടുന്നത്.
ബൈബിളിന്റെ വെളിച്ചത്തിൽ മനുഷ്യ ജീവിതത്തിന്റെ ബഹുമുഖമായ യാഥാർത്ഥ്യങ്ങളെ നോക്കിക്കാണുവാൻ ആഗ്രഹിക്കുന്ന വ്യക്തിയാണ് നിങ്ങൾ എങ്കിൽ ഈ ദൗത്യത്തിൽ നമുക്ക് ഒരുമിച്ചു നിൽക്കാം.
