പുനരുത്ഥാനത്തിനൊരു സ്ത്രീസാക്ഷ്യം

തകര്‍ച്ചയുടെ പടുകുഴിയില്‍നിന്ന് ജീവിതങ്ങളെ കരകയറ്റി ക്രിസ്തുവിന് സാക്ഷികളാക്കി ഉയര്‍ത്തി നിര്‍ത്തുവാന്‍ ദൈവത്തിന് കഴിയും. മഗ്ദലന മറിയത്തിന്‍റെ ജീവിതം അതിനൊരു ഉദാഹരണം മാത്രം. 

ഇന്ന് സമൂഹത്തില്‍ ഏറെ ഉയര്‍ന്നു കേള്‍ക്കുന്നതും പല ചര്‍ച്ചകള്‍ക്കും വിഷയീഭവിച്ചിട്ടുള്ളതുമായ ആശയങ്ങളാണ് സ്ത്രീ ശാക്തീകരണം, സ്ത്രീ വിമോചനം, സ്ത്രീ സമത്വം എന്നിവ. തൊഴില്‍ രാഷ്ട്രീയ മേഖലകളിലുള്ള സംവരണവും കുടുംബശ്രീ, തൊഴിലുറപ്പ് തുടങ്ങിയ പദ്ധതികളും ഈ സാമൂഹിക വിപ്ലവത്തിന്‍റെ ഉദാഹരണങ്ങളാണ്. ഇപ്രകാരമുള്ള സാമൂഹിക പ്രവര്‍ത്തനങ്ങള്‍ സ്ത്രീകളെ സമൂഹത്തിന്‍റെ മുഖ്യധാരയിലേക്ക് എത്തിക്കുവാന്‍ പരിശ്രമിക്കുകയും, കുറെയൊക്കെ അതില്‍ വിജയിക്കുകയും ചെയ്തിട്ടുണ്ട്. 

ഏതുകാലത്തും സ്ത്രീകള്‍ സമൂഹത്തിലെ പാര്‍ശ്വവല്‍ക്കരിക്കപ്പെട്ട വിഭാഗമായിരുന്നു. പുതിയനിയമ കാലത്തെ യഹൂദ-ജാതീയ ലോകവും ഇതിന് അപവാദമായിരുന്നില്ല. അങ്ങനെയുള്ള സാമൂഹിക-മത പശ്ചാത്തലത്തില്‍ സ്ത്രീ വിലയുള്ളവളാണ് എന്ന് സമൂഹത്തിനു മുന്നില്‍ എടുത്തുകാട്ടിയത് നമ്മുടെ കര്‍ത്താവായ യേശുക്രിസ്തുവാണ്. കര്‍ത്താവിന്‍റെ പരസ്യശുശ്രൂഷാ കാലത്ത് എത്രയോ സ്ത്രീകള്‍ കര്‍ത്താവിനോട് അടുത്ത് ഇടപെട്ടു; എത്രയോ സ്ത്രീകളുടെ അപമാന ഭാരം അവിടുന്ന് എടുത്തുമാറ്റി മാന്യമായ ജീവിതത്തിലേക്ക് അവരെ കൈപിടിച്ചാനയിച്ചു; എത്രയോ സ്ത്രീകള്‍ അവിടുത്തെ ശുശ്രൂകള്‍ക്കു സഹായികളായി കൂടെയുണ്ടായിരുന്നു (ലൂക്കൊ 8: 1-3). 

ഉത്തരവാദിത്വങ്ങളിലും സ്ഥാനങ്ങളിലും സ്ത്രീകളും പുരുഷന്മാരും തമ്മില്‍ വ്യത്യാസമുണ്ടെങ്കിലും, മൂല്യത്തില്‍ എല്ലാവരും തുല്ല്യരാണ് എന്ന് അപ്പൊസ്തലനായ പൗലോസ് 1 കൊരി 11: 11; ഗലാ 3: 28 എന്നീ വാക്യങ്ങളില്‍ പ്രഖ്യാപിക്കുന്നു”ന സ്ത്രീ സ്വാതന്ത്ര്യമര്‍ഹതി” എന്നും”സ്ത്രീകള്‍ക്ക് ആത്മാവില്ല” എന്നുമൊക്കെ  പഠിപ്പിക്കുന്ന മതധാരണകളുടെ മധ്യത്തില്‍ ക്രൈസ്തവ വിശ്വാസം സ്ത്രീയ്ക്ക് കല്‍പ്പിക്കുന്ന മൂല്യം വളരെ വലുതാണ്.

ബൈബിളിലെ സ്ത്രീകഥാപാത്രങ്ങളെക്കുറിച്ചുള്ള പഠനം  സ്ത്രീകള്‍ക്ക് ദൈവം നല്‍കുന്ന മൂല്യവും മാന്യതയും തിരിച്ചറിയുവാനും, ആത്മീക ശുശ്രൂഷകളില്‍ സ്ത്രീകള്‍ക്കുള്ള പങ്ക് മനസ്സിലാക്കുവാനും, ആത്മീയ ജീവിതത്തിന് നല്ല മാതൃകകള്‍ ലഭിക്കുവാനും ഇടയാകുന്നു. ഇതുവഴി സ്ത്രീകള്‍ക്ക് കൂടുതല്‍ ആത്മാഭിമാനത്തോടെ ജീവിക്കുവാനും ദൈവരാജ്യത്തിനു പ്രയോജനപ്പെടുവാനും ഇടയാകുന്നു.

ജീവിച്ചിരുന്ന കാലത്ത് ഒരുപക്ഷെ അധികമാരും അറിയാത്തവളും ഇന്ന് ബൈബിള്‍ എത്തിയ എല്ലായിടങ്ങളിലും അറിയപ്പെടുന്നവളുമായ ഒരു സ്ത്രീയുടെ ജീവിതമാണ് ഈ ലേഖനത്തിലൂടെ അവതരിപ്പിക്കുന്നത്. മഗ്ദലനമറിയം എന്ന് പുതിയനിയമം പരിചയപ്പെടുത്തുന്ന മറിയമാണ് ആ സ്ത്രീ. 

ബൈബിളിലെ മഗ്ദലന മറിയം

കര്‍ത്താവിന്‍റെ അമ്മ മറിയം, ബേഥാന്യയിലെ ലാസറിന്‍റെ സഹോദരി മറിയം, ക്ലെയൊപ്പാവിന്‍റെ ഭാര്യ മറിയം എന്നിങ്ങനെ മറിയം എന്നു പേരുള്ള പല സ്ത്രീകളെയും സുവിശേഷങ്ങളില്‍ നമുക്കു കാണാം. ഈ സ്ത്രീകളില്‍, “സ്ത്രീകളില്‍ അനുഗ്രഹിക്കപ്പെട്ടവൾ ” ആയ കര്‍ത്താവിന്‍റെ അമ്മ മറിയം കഴിഞ്ഞാല്‍ ഏറ്റവും പ്രസക്തമായ നാമങ്ങളിലൊന്ന് മഗ്ദല മറിയത്തിന്‍റെതാണ്. 14 പ്രാവശ്യത്തോളം മഗ്ദലന മറിയത്തെക്കുറിച്ച് സുവിശേഷങ്ങളില്‍ രേഖപ്പെടുത്തിയിട്ടുണ്ട്. 

ഒരുപക്ഷെ ബൈബിളിലെ സ്ത്രീ കഥാപാത്രങ്ങളില്‍ ഏറ്റവും തെറ്റിദ്ധരിക്കപ്പെട്ട വ്യക്തിയും മഗ്ദലന മറിയമായിരിക്കാം. പലരും അവളെ ഒരു മുന്‍ വേശ്യയായി ചിത്രീകരിക്കുന്നു. പക്ഷെ ഇതിന് ബൈബിളില്‍ തെളിവുകളില്ല. ചിലര്‍ അവളെ, ലൂക്ക 7: 37 ല്‍ യേശുവിന്‍റെ കാലില്‍ തൈലം പൂശി കണ്ണുനീരുകൊണ്ടു തുടച്ച പാപിനിയായ സ്ത്രീയായി വിവരിക്കുന്നു. ഇതിനും ബൈബിളില്‍ തെളിവുകളില്ല. വേറെ ചിലരാകട്ടെ അവളെ, ബേഥാന്യയിലെ ലാസറിന്‍റെ സഹോദരി മറിയമാണ് എന്നും അവളെ മഗ്ദലന എന്ന സ്ഥലത്തേക്കു വിവാഹം ചെയ്ത് അയച്ചതിനാല്‍ പിന്നീട് മഗ്ദലനക്കാരത്തി മറിയമായി എന്നും അഭിപ്രായപ്പെടുന്നു. ഈ ആശയവും ബൈബിളില്‍ നിന്നും തെളിയിക്കുവാന്‍ കഴിയുന്നതല്ല. സഭാ പിതാക്കന്മാരുടെ എഴുത്തുകളിലും മഗ്ദലനക്കാരത്തി മറിയത്തിന് അപഹാസ്യമായ ഒരു പൂര്‍വ്വകാലം ഉണ്ടായിരുന്നതായി പ്രതിപാദിച്ചിട്ടില്ല. യഹൂദ തല്‍മൂദില്‍ മഗ്ദലന എന്ന സ്ഥലം ദുര്‍ന്നടപ്പ് നിമിത്തം നശിപ്പിക്കപ്പെട്ടു എന്നൊരു പരാമര്‍ശം ഉള്ളതിനാലായിരിക്കും മറിയം വ്യഭിചാരിണിയായിരുന്നു എന്ന് പലരും കരുതുവാനുള്ള കാരണം. അതേ തുടര്‍ന്ന് റോമന്‍ കത്തോലിക്കര്‍ 1324 ല്‍ നേപ്പിള്‍സ് എന്ന് സ്ഥലത്ത് വേശ്യാസ്ത്രീകളുടെ പുനരുദ്ധാരണത്തിനായി “മഗ്ദലന ഭവനം” (Magdalen House)) എന്നൊരു സ്ഥാപനം തുറന്നതും മഗ്ദലനക്കാരി മറിയത്തെക്കുറിച്ച് ഇപ്രകാരം ഒരു ചിന്ത പ്രചരിക്കുവാന്‍ കാരണമായിട്ടുണ്ടാകാം.

    ചില വര്‍ഷങ്ങള്‍ക്കു മുന്‍പ് പുറത്തിറങ്ങിയ”ഡാവിഞ്ചി കോഡ്” എന്ന നോവലിലൂടെയും സിനിമയിലൂടെയും ഡാന്‍ ബ്രൗണ്‍ എന്ന എഴുത്തുകാരന്‍, മഗ്ദലന മറിയത്തെ യേശുക്രിസ്തുവിന്‍റെ ഭാര്യയായി ചിത്രീകരിക്കുകയുണ്ടായി. ലിയൊനാഡോ ഡാ വിഞ്ചി വരച്ച അന്ത്യഅത്താഴം എന്ന ചിത്രത്തില്‍, യേശുവിന്‍റെ മാറില്‍ ചാരിയിരിക്കുന്ന വ്യക്തി യോഹന്നാന്‍ അല്ല, മഗ്ദലന മറിയമാണ് എന്ന് ആ നോവലില്‍ ഡാന്‍ ബ്രൗണ്‍ സമര്‍ത്ഥിക്കുവാന്‍ ശ്രമിക്കുന്നു. തന്‍റെ ഈ പുസ്തകം ഒരു നോവല്‍ മാത്രമാണ്, ചരിത്രമല്ല എന്ന് ഡാന്‍ ബ്രൗണ്‍ തന്നെ പറഞ്ഞുവെങ്കിലും അത് ചരിത്രമാണെന്ന് തെറ്റിദ്ധരിച്ചിരിക്കുന്ന  ശുദ്ധന്മാരെയോര്‍ത്ത് സഹതപിക്കാനേ കഴിയൂ.

ബൈബിള്‍ മഗ്ദലന മറിയത്തെക്കുറിച്ച് എന്തുപറയുന്നു എന്നാണ് നാം പരിഗണിക്കേണ്ടത്. മനുഷ്യരുടെ അഭിപ്രായങ്ങളും ഭാവനകളും എന്തുമായിക്കൊള്ളട്ടെ, ദൈവവചനത്തോട് അവ യോജിക്കുന്നതല്ലെങ്കില്‍ അവയെ ആധികാരികമായി സ്വീകരിക്കേണ്ട ആവശ്യമില്ല. 

    “മഗ്ദലക്കാരത്തി മറിയം” (മര്‍ക്കൊ 19: 9) എന്ന പേര് അവളുടെ ദേശവുമായി ബന്ധപ്പെട്ട വിശേഷണമാണ്. നസ്രത്തില്‍ വളര്‍ന്ന യേശുവിനെ നസ്രായനായ യേശു എന്നു പറയുന്നതുപോലെ. മഗ്ദല അഥവാ മഗദ എന്ന സ്ഥലം ഗലീല കടലിനു പടിഞ്ഞാറെ തീരത്ത്, തിബരിയാസിനും കഫര്‍ന്നഹൂമിനും ഇടയിലുള്ള ഒരു ചെറിയ പട്ടണമാണ്. മഗ്ദലന മറിയത്തിന്‍റെ കുടുംബ പശ്ചാത്തലത്തെക്കുറിച്ചോ ജീവിതത്തെക്കുറിച്ചോ കാര്യമായ പരാമര്‍ശങ്ങളൊന്നും ബൈബിളില്‍ കാണുന്നില്ല.

മഗ്ദലന മറിയത്തിന്‍റെ  പൂര്‍വ്വകാലത്തെക്കുറിച്ച് നമുക്ക് വെളിച്ചം നല്‍കുന്ന വേദഭാഗങ്ങള്‍ മര്‍ക്കൊ 16: 9; ലൂക്ക 8: 2 എന്നിവയാണ്. അവിടെ കര്‍ത്താവ്  “ഏഴു ഭൂതങ്ങളെ പുറത്താക്കിയിരുന്ന മഗ്ദലക്കാരത്തി മറിയچ” എന്ന് രേഖപ്പെടുത്തിയിട്ടുണ്ട്. ഇതിനപ്പുറത്തേക്ക് ഒന്നും ഇവളെക്കുറിച്ച് പ്രതിപാദിച്ചിട്ടില്ല. തുടര്‍ന്ന്, യേശുക്രിസ്തുവിന്‍റെ ഒരു അനുഗാമിയായി അവസാനം വരെ കൂടെയുണ്ടായിരുന്നവളായി കാണുന്ന മറിയത്തിന്‍റെ ജീവിതത്തില്‍ നിന്നും നമുക്ക് അവളുടെ പ്രത്യേകതകള്‍ പരിശോധിക്കാം.

പുതിയ ജീവിതം

    എവിടെവെച്ചാണ് കര്‍ത്താവിനെ മറിയം കണ്ടുമുട്ടിയതെന്നോ അവളില്‍ നിന്നും ഏഴുഭൂതങ്ങളെ പുറത്താക്കിയത് എന്നോ ബൈബിള്‍ പറയുന്നില്ല. എന്നാല്‍ ഭൂതബാധിതയായി ജീവിച്ച അവളുടെ “ഭൂതകാലം” ദുരിതപൂര്‍ണ്ണമായിരുന്നു എന്ന് നമുക്ക് ഊഹിക്കാവുന്നതേയുള്ളൂ. ഭൂതബാധ  ജീവിതത്തെ താറുമാറാക്കുന്ന കാഴ്ച സുവിശേഷങ്ങളില്‍ നാം കാണുന്നുണ്ട്. ഉദാഹരണമായി, മര്‍ക്കൊ 9: 17 ലെ എവിടെവച്ച് ബാധിച്ചാലും തള്ളിയിടുന്ന ഊമനായ ആത്മാവ്… നുരച്ച്, പല്ലുകടിച്ച് മരവിച്ച് പോകുമാറാക്കുന്ന ആത്മാവ്. മര്‍ക്കൊ 5: 2 ലെ കല്ലറകളില്‍ ജീവിക്കുന്ന ഭൂതബാധിതന്‍… രാവും പകലും ഇടവിടാതെ നിലവിളിക്കുന്നു… കല്ലുകൊണ്ട് തന്നെത്താന്‍ ചതയ്ക്കുന്നു… ആര്‍ക്കും അവനെ ബന്ധിച്ചുകൂട… സുബോധമില്ല, വസ്ത്രവുമില്ല. ചിലരെ ഭൂതം തീയിലും വെള്ളത്തിലും വീഴിക്കുന്നു. അതായത്, സ്വന്തം ജീവിത്തിന്‍റെ മേല്‍ യാതൊരു നിയന്ത്രണവുമില്ലാതെ, എല്ലാം ഭൂതങ്ങളുടെ ഇഷ്ടത്തിനനുസരിച്ച് നടക്കുന്ന നശിച്ച ജീവിതം! അവിടെ യാതൊരു വിധ സുബോധമോ സന്തോഷമോ പ്രത്യാശയോ ഇല്ല. നാശത്തില്‍ നിന്നും നാശത്തിലേക്കുള്ള യാത്ര! ഒരു ഭൂതം ബാധിച്ചവരുടെ അവസ്ഥ ഇങ്ങനെയൊക്കെയാണെങ്കില്‍, ഏഴു ഭൂതങ്ങള്‍ ബാധിച്ച് അവളുടെ അവസ്ഥ എത്രയോ മടങ്ങ് ദുരിതപൂര്‍ണ്ണമായിരുന്നിരിക്കണം. 

എന്തായാലും കാരുണ്യവാനായ ദൈവത്തിന്‍റെ കൃപയാല്‍ മഗ്ദലക്കാരത്തി മറിയവും കര്‍ത്താവിന്‍റെ അരികിലെത്തി; യേശു അവളില്‍ നിന്നും ഏഴു ഭൂതങ്ങളെയും പുറത്താക്കി അവളെ സ്വതന്ത്രയാക്കി. അവള്‍ വീണ്ടെടുക്കപ്പെട്ടു. ഒരു വ്യക്തിയുടെ ജീവിതപശ്ചാത്തലം എന്തുതന്നെയായിരുന്നാലും കര്‍ത്താവിന്‍റെ അടുക്കല്‍ വരുമ്പോള്‍ സമൂലമായ പരിവര്‍ത്തനത്തിനു വിധേയമായിത്തീരുന്നു. അവര്‍ പുതിയ സൃഷ്ടികളായി തീരുന്നു. കര്‍ത്താവിനു ക്ഷമിക്കുവാന്‍ കഴിയാത്ത പാപമില്ല; അഴിക്കുവാന്‍ കഴിയാത്ത ബന്ധനമില്ല; മായ്ക്കാന്‍ കഴിയാത്ത ഭൂതകാലവുമില്ല.

നമ്മുടെ ഭൂതകാലം പലപ്പോഴും നമ്മുടെ വര്‍ത്തമാനകാലത്തെ നിയന്ത്രിക്കാറുണ്ട്. കഴിഞ്ഞകാലജീവിത്തിലെ പരാജയങ്ങളുടെയും പാപങ്ങളുടെയും കുറ്റബോധം വിശ്വാസജീവിത്തില്‍ മുന്നോട്ടുപോകുന്നതില്‍ നിന്നും പലരെയും തടയുന്നുണ്ട് എന്നത് വാസ്തവമാണ്. എന്നാല്‍ നാം എപ്പോഴും ഓര്‍ക്കണം,”പുത്രന്‍ നിങ്ങള്‍ക്കു സ്വതന്ത്ര്യം വരുത്തിയാല്‍ നിങ്ങള്‍ സാക്ഷാല്‍ സ്വതന്ത്രരാകും.” (യോഹ 8: 36). 

പാപിനിയായ സ്ത്രീയെ പാപങ്ങള്‍ മോചിച്ച് സ്വതന്ത്രയാക്കിയ കര്‍ത്താവ്; കഫര്‍ന്നഹൂമിലെ തളര്‍വാതരോഗിയുടെ പാപത്തിന്‍റെ കെട്ടഴിച്ച കര്‍ത്താവ്; സക്കായിയുടെ പാപപങ്കിലമായ ജീവിതത്തെ ശുദ്ധീകരിച്ച കര്‍ത്താവ്; ഇന്നും ജീവിക്കുന്നു. അവിടുത്തെ ഹൃദയത്തില്‍ നിന്നും പുറപ്പെട്ട രക്ത ഉറവ് ഇന്നും തുറന്നിരിക്കുന്നു. ക്രിസ്തുവില്‍ സമ്പൂര്‍ണ്ണമായ പാപമോചനവും വീണ്ടെടുപ്പും ഉണ്ട് എന്ന് നമ്മില്‍ മിക്കവര്‍ക്കും അറിവുള്ളപ്പോള്‍ തന്നെ, പാപത്തെക്കുറിച്ചുള്ള ബോധമോ ശുദ്ധീകരിക്കപ്പെടേണ്ട ആവശ്യം എനിക്കുണ്ട് എന്ന ബോധ്യമോ ഇല്ലാതെയാണ് പലരും ജീവിക്കുന്നത്. രക്ഷിക്കപ്പെട്ടപ്പോള്‍”ഞാനൊരു പാപിയാണ്” എന്ന് നമ്മള്‍ ഏറ്റു പറഞ്ഞതാണ് എങ്കിലും, പിന്നീട് അതൊക്കെ മറന്നു. 

പണ്ട് ഞാന്‍ അംഗമായിരുന്ന ഒരു സഭയില്‍ എനിക്കു വളരെ അടുപ്പമുണ്ടായിരുന്ന ഒരു ടീച്ചറിന്‍റെ ഭര്‍ത്താവിനോട് എങ്ങനെയാണ് അദ്ദേഹം രക്ഷിക്കപ്പെട്ടത് എന്ന് ചോദിച്ചു. അതിന് അദ്ദേഹം പറഞ്ഞ മറുപടി ഇപ്രകാരമായിരുന്നു, “ഓ, എനിക്കങ്ങനെ നിങ്ങളെ ഞെട്ടിക്കത്തക്ക സാക്ഷ്യമൊന്നുമില്ല. പണ്ടും ഞാനൊരു കുഞ്ഞാടായിരുന്നു… ഇപ്പോഴും അങ്ങനെ തന്നെ.”  പണ്ടും കുഞ്ഞാട് ഇപ്പോഴും കുഞ്ഞാട്! എന്ത് നല്ല സ്വഭാവം!

എന്നാല്‍ കുഞ്ഞാടാണെന്നു സ്വയം കരുതുന്നവര്‍ ദൈവവചനം ശരിയായ രീതിയില്‍ മനസ്സിലാക്കിയാല്‍, അഥവാ വചനമാകുന്ന കണ്ണാടിയിലൂടെ നോക്കിയാല്‍ മനസ്സിലാകും, യഥാര്‍ത്ഥത്തില്‍ നമ്മുടെ അവസ്ഥ എന്തായിരുന്നു എന്നും ദൈവം നമ്മെ എങ്ങനെയായിരുന്നു കണ്ടത് എന്നും. “അതിക്രമങ്ങളാലും പാപങ്ങളാലും മരിച്ചവര്.. പിശാചിനെ  അനുസരിച്ചു നടക്കുന്നവര്‍… പ്രകൃതിയാല്‍ കോപത്തിന്‍റെ മക്കള്‍…” (എഫെ 2: 1-5). ഇതൊക്കെയായിരുന്നു നമ്മള്‍. പുറമെ നാം ഒരു പക്ഷെ മാന്യരും നീതിയുള്ളവരും ആയിരിക്കാം. എന്നാല്‍ ദൈവം ഹൃദയങ്ങളെ കാണുന്നവനും അന്തരിന്ദ്രിയങ്ങളെ ശോധന ചെയ്യുന്നവനുമാണ് എന്ന് നാം  മറക്കരുത്. 

നാശത്തിന്‍റെ വഴിയെ പോയിരുന്ന നമ്മെ കര്‍ത്താവ് വിളിച്ചു ശുദ്ധീകരിച്ചു, മഗ്ദല മറിയത്തെപ്പോലെ സ്വതന്ത്രരാക്കി. മഗ്ദലമറിയത്തിനു വന്ന രൂപാന്തരം നമ്മുടെ ജീവിതത്തില്‍ ഉണ്ടോ? . കര്‍ത്താവിന്‍റെ അടുക്കല്‍ വരുന്നവര്‍ വിടുവിക്കപ്പെടും… ശുദ്ധീകരിക്കപ്പെടും… മറിയത്തെപ്പോലെ. മുന്‍പിലത്തെ ശുദ്ധീകരണം മറന്നുപോകാത്തവരാണ് കര്‍ത്താവിനോടു സ്നേഹവും സമര്‍പ്പണവും ഉള്ളവരായി ജീവിക്കുന്നത്. മറിയത്തിനു കര്‍ത്താവ് നല്‍കിയത് എത്ര വലിയ വിടുതലായിരുന്നു. കര്‍ത്താവു നല്‍കിയ ആ വിടുതലിനോടുള്ള പ്രതികരണമായിരുന്നു മറിയത്തിന്‍റെ തുടര്‍ന്നുള്ള ജീവിതം. 

അനുഗമിക്കുന്ന ശിഷ്യ

തന്നെ വിടുവിച്ച യേശുക്രിസ്തുവിനെ വിട്ടുമാറാതെ അനുഗമിക്കുന്നവളായാണ് മറിയത്തെ പിന്നീട് നാം കാണുന്നത്.  (ലൂക്കൊ 8: 1-2) കര്‍ത്താവിന്‍റെ പ്രസംഗ പര്യടനങ്ങളില്‍ സഹായിയായും വസ്തുവകകള്‍ കൊണ്ട് ശുശ്രൂഷ ചെയ്തും മറ്റു സ്ത്രീകളോടൊപ്പം മഗ്ദലന മറിയവും ഉണ്ടായിരുന്നു. ഒരു പക്ഷെ കര്‍ത്താവിനും ശിഷ്യന്മാര്‍ക്കും ഭക്ഷണം ഉണ്ടാക്കികൊടുക്കുകയൊ, വസ്ത്രം അലക്കികൊടുക്കുകയൊ വിശ്വാസത്തിലേക്കു വരുന്ന സ്ത്രീകളെ ധൈര്യപ്പെടുത്തുകയോ ഒക്കെ ആയിരിക്കാം മറിയം ചെയ്തത്. ശമര്യക്കാരി സ്ത്രീയെപ്പോലെ തന്‍റെ ജീവിതസാക്ഷ്യവും മറിയം മറ്റുള്ളവരോട് പങ്കുവച്ചുകാണും.

ഗലീലയില്‍ മാത്രം ഒതുങ്ങുന്നതായിരുന്നില്ല മറിയത്തിന്‍റെ അനുധാവനം. കര്‍ത്താവിന്‍റെ കഷ്ടാനുഭവ ആഴ്ചയില്‍ അവസാനം വരെ മറിയം അവിടുത്തെ അനുഗമിച്ചു. മഗ്ദല എന്ന സ്ഥലം ഗലീലയിലെ ഒരു പട്ടണമാണ് എന്ന് നേരത്തേ  പറഞ്ഞുവല്ലോ. ഗലീലയില്‍ നിന്നും യരുശലേമിലേക്കുള്ള കര്‍ത്താവിന്‍റെ യാത്ര മരണത്തിലേക്കുള്ള  യാത്രയായിരുന്നു. ശിഷ്യന്മാരില്‍തന്നെ അനേകര്‍ വിട്ടുപോയപ്പോള്‍ മറിയം അനുഗമിച്ചു. കാരണം ക്രിസ്തുവിനോടുള്ള അവളുടെ കടപ്പാട് വലിയതായിരുന്നു.  ഗത്സമനയില്‍ വച്ച് കര്‍ത്താവിനെ ബന്ധിച്ചപ്പോള്‍ കൂടെയുണ്ടായിരുന്ന ശിഷ്യഗണം ഓടി രക്ഷപെട്ടു. എന്നാല്‍ കരിശിന്‍റെ ചുവട്ടിലും കര്‍ത്താവിനെ അവള്‍ വിട്ടു മാറിയില്ല. . ലൂക്കൊസ് ഒഴികെ എല്ലാ സുവിശേഷകന്മാരും അത് രേഖപ്പെടുത്തിയിട്ടുണ്ട്. ലൂക്കൊസാകട്ടെ ആരുടെയും പേരു പറയാതെ ”ഗലീലയില്‍ നിന്ന് അവനെ അനുഗമിച്ച സ്ത്രീകള്‍” (ലൂക്കൊ 23: 49) എന്ന് പറഞ്ഞിരിക്കുന്നു.

“യേശുവിന്‍റെ മേശയില്‍ നിന്നും അപ്പം ഭക്ഷിക്കുവാന്‍ ഇഷ്ടപ്പെടുന്ന അനേകരുണ്ട്; എന്നാല്‍ അവിടത്തേക്കുവേണ്ടി ക്രൂശെടുക്കുവാന്‍ തയ്യാറുള്ളവരില്ല.യേശുവിന്‍റെ കൂടെ വീഞ്ഞുകുടിക്കുവാന്‍ ഇഷ്ടമുള്ള അനേകരുണ്ട്; എന്നാല്‍ അവിടുത്തെ കഷ്ടതകളുടെ പാനപാത്രത്തില്‍ നിന്നും കുടിക്കുവാന്‍ ആളില്ല.”എന്ന് തോമസ് അ കെമ്പിസ്, ദി ഇമിറ്റേഷന്‍ ഓഫ് ക്രൈസ്ററ് എന്ന പ്രസിദ്ധമായ പുസ്തകത്തില്‍ പറയുന്നത് എത്ര ശരിയാണ്.

പണക്കൊതി നിമിത്തം യൂദാസ് കര്‍ത്താവിനെ ഒറ്റിക്കൊടുത്തു. “നിന്നെ വിട്ട് എവിടെപോകാൻ ” എന്നു ചോദിച്ച പത്രൊസ്പോലും ഭയം കാരണം തള്ളിപ്പറഞ്ഞു. മറ്റുള്ളവരെല്ലാവരും തന്നെ ചിതറിയോടി. എന്നാല്‍ മഗ്ദല മറിയം അവിടെയും കര്‍ത്താവിനെ അനുഗമിച്ചു. 

യേശുവിന്‍റെ പീഡാനുഭവങ്ങള്‍, കുരിശുമരണം, കല്ലറയിലെ അടക്കം, എല്ലാം സ്ത്രീകളെ സംബന്ധിച്ചിടത്തോളം വളരെ ഭയം ഉളവാക്കുന്ന രംഗങ്ങളാണ്. എന്നാല്‍ റോമന്‍ പടയാളികളോ, ആക്രോശിക്കുന്ന പുരുഷാരമോ, ചാട്ടവാറിടിയുടെ ശബ്ദ്മോ ഒന്നും അവള്‍ ഭയപ്പെടുന്നില്ല. കാരണം കര്‍ത്താവിനോട് അവള്‍ക്കുണ്ടായിരുന്ന സ്നേഹം അത്ര അധികമായിരുന്നു. തികഞ്ഞസ്നേഹം ഭയത്തെ പുറത്താക്കുന്നു എന്നാണല്ലോ!(1 യോഹ 4: 18) 

യേശുവിന്‍റെ കല്ലറയ്ക്കരികിലും  മറിയത്തെ നാം കാണുന്നു. “മറിയം അതിരാവിലെ ഇരുട്ടുള്ളപ്പോള്‍ തന്നെ കല്ലറയ്ക്കല്‍ ചെന്നു”(യോഹ 20: 1).  മറിയത്തോടൊപ്പം ഗലീലയില്‍ നിന്ന് കര്‍ത്താവിനെ അനുഗമിച്ച മറ്റു സ്ത്രീകളും  ഉണ്ടായിരുന്നതായി ലൂക്കോസ് എഴുതുന്നു.  യേശുവിന്‍റെ ശരീരം കാണാതെ ശങ്കിച്ചു നില്‍ക്കുന്ന അവരോടു ദൂതന്മാര്‍ അവിടുന്ന് ഉയിര്‍ത്തെഴുന്നേറ്റു എന്ന് അറിയിച്ചു. അവര്‍ അത് ശിഷ്യന്മാരെ അറിയിച്ചു. അവരും വന്നു നോക്കി, കര്‍ത്താവിന്‍റെ ശരീരം കാണാത്തതിനാല്‍ വീട്ടിലേക്കു മടങ്ങിപ്പോയി.  എന്നാല്‍ മറിയം തനിച്ച് കല്ലറയുടെ വാതില്‍ക്കല്‍ കരഞ്ഞുകൊണ്ട് നിര്‍ക്കുന്ന കാഴ്ചയാണ് നാം കാണുന്നത്.  മടങ്ങിപ്പോകുവാന്‍ അവള്‍ക്കു മനസ്സുവന്നില്ല. 

മറിയത്തിന്‍റെ ഈ അഞ്ചലമായ സ്നേഹമാണ്, കര്‍ത്താവിനെ അനുഗമിക്കുന്നതിനു തടസമായി മറ്റുപലരും കാണുന്ന ഭയപ്പെടുത്തുന്ന പ്രതികൂലങ്ങളെ അവഗണിക്കുവാന്‍ മറിയത്തെ ധൈര്യപ്പെടുത്തിയത്. മഗ്ദലന മറിയത്തിന്‍റെ സ്നേഹം നമുക്കുണ്ടോ? രക്ഷിച്ച കര്‍ത്താവിനെ അനുഗമിക്കുമ്പോള്‍ പ്രതീക്ഷിക്കാത്ത പ്രതികൂലങ്ങള്‍ എവിടെയും ഉണ്ടാകാം. താന്‍ ആശ്രയം വച്ച കര്‍ത്താവ് കല്ലറയില്‍ ഒതുങ്ങിയതു കണ്ടതുപോലെ നിരാശജനിപ്പിക്കുന്ന സാഹചര്യങ്ങള്‍ ജീവിതത്തില്‍ വന്നേക്കാം. നിലം വരെ താഴ്ത്തുന്ന തരത്തിലുള്ള പരിഹാസങ്ങളും നിന്ദകളും ശിഷ്യത്വത്തിന്‍റെ പാതയില്‍ നമ്മെ കാത്തിരിക്കുന്നു. ജീവന്‍ അപകടത്തിലാകാവുന്ന സാഹചര്യങ്ങള്‍ ക്രിസ്തീയജീവിതത്തില്‍ ഉണ്ടാകാം. അപ്പോള്‍ നാം പിന്‍തിരിയുമോ അതോ, മഗ്ദലന മറിയത്തെപ്പോലെ കര്‍ത്താവിനോട് ചേര്‍ന്നു നില്‍ക്കുമോ? 

മഗ്ദലക്കാരി മറിയത്തെക്കുറിച്ച് പുതിയനിയമത്തില്‍ 14 പ്രാവശ്യം പരാമര്‍ശമുണ്ട്. ഇതില്‍ മിക്കയിടങ്ങളിലും മറ്റു സ്ത്രീകളോടൊപ്പമാണ് ഇവളെ കാണുന്നത് എങ്കിലും, ഏഴ് ഇടങ്ങളില്‍ ആദ്യം പറയുന്നത് മഗ്ദലക്കാരി മറിയത്തിന്‍റെ പേരാണ്. കര്‍ത്താവിന്‍റെ അമ്മ മറിയത്തെ പോലും പലയിടത്തും പിന്നിലാക്കിയാണ് സുവിശേഷകന്മാര്‍ ഇവളുടെ പേര് ആദ്യം രേഖപ്പെടുത്തിയിരിക്കുന്നത്. ഒരു കൂട്ടം ആളുകളുടെ പേരുകള്‍ പറയുമ്പോള്‍ ഒരാളുടെ പേര് തുടര്‍ച്ചയായി ആദ്യമെ പരാമര്‍ശിക്കുമ്പോള്‍ ആ വ്യക്തിക്ക് മറ്റുള്ളവരേക്കാള്‍ എന്തെങ്കിലും പ്രാധാന്യം കാണും എന്നത് സാമാന്യ യുക്തിയാണ്. അങ്ങനെയെങ്കില്‍ മറിയമായിരുന്നിരിക്കാം കര്‍ത്താവിനെ അനുഗമിച്ച സ്ത്രീകളുടെ ലീഡര്‍. കല്ലറയോളും ക്രിസ്തുവിനെ അനുഗമിക്കുവാന്‍ മറ്റു സ്ത്രീകളെ ധൈര്യപ്പെടുത്തിയതും പ്രോത്സാഹിപ്പിച്ചതും മഗ്ദലനക്കാരി മറിയമായിരിക്കാം. ക്രൂശിനോടു  ആളുകളെ ചേര്‍ത്തു നിര്‍ത്തുക അത്ര എളുപ്പമുള്ള ജോലിയല്ല. ആത്മീയമായ പക്വതയും വിശുദ്ധിയും ഉള്ളവര്‍ക്കെ ഇത്തരം ശുശ്രൂഷകള്‍ നിര്‍വ്വഹിക്കുവാന്‍ കഴിയൂ. മറ്റുള്ളവരെ കര്‍ത്താവില്‍നിന്ന് അകറ്റിക്കളയുന്നരും  അവരുടെ ജീവിതങ്ങള്‍ തകര്‍ത്തു കളയുന്നവരുമല്ല, കര്‍ത്താവിനോടു ചേര്‍ത്ത് ആളുകളെ നിര്‍ത്തുകയും സഭയും കുടുംബവും ഒക്കെ പണിതുയര്‍ത്തുകയും ഒക്കെ ചെയ്യുന്നവരാണ് ബുദ്ധിയും ഭക്തിയും ഉള്ള സ്ത്രീകള്‍. 

ഉയിര്‍പ്പിന് സാക്ഷി

യോഹന്നാന്‍ 20 ല്‍ കര്‍ത്താവ് ഉയിര്‍ത്തെഴുന്നേറ്റ ദിവസം കല്ലറയ്ക്കല്‍ നടന്ന സംഭവങ്ങള്‍ നാം വായിക്കുന്നു. മഗ്ദലക്കാരത്തി മറിയം”രാവിലെ ഇരുട്ടുള്ളപ്പോള്‍ ത്തന്നെ കല്ലറയ്ക്കല്‍ എത്തി”. തുറന്ന കല്ലറയെക്കുറിച്ച് ആദ്യം ശിഷ്യന്മാരെ അറയിക്കുന്നത് അവളാണ്.   ഉയിര്‍പ്പിനെക്കുറിച്ചു കര്‍ത്താവ് പലതവണ മുന്‍കൂട്ടി പറഞ്ഞിരുന്നു എങ്കിലും അതിന്‍റെ പൊരുള്‍ അന്നൊന്നും ശിഷ്യന്മാര്‍ക്ക് മനസ്സിലായിരുന്നില്ല. അതുകൊണ്ടുതന്നെ കല്ലറയില്‍ ശരീരം കാണാതെ വന്നപ്പോള്‍ അവര്‍ ആശ്ചര്യപ്പെട്ടു.  ആശയക്കുഴപ്പവും ഭയവും ദുഖവും നിറഞ്ഞവരായി എല്ലാവരും മടങ്ങിപ്പോയി.എന്നാല്‍ ആദ്യം വന്ന മറിയം മാത്രം മടങ്ങിപ്പോയില്ല.കാരണം അവള്‍ക്ക് പുതുജീവന്‍ നല്‍കിയ കര്‍ത്താവില്ലാത്ത ജീവിതം  അവള്‍ക്കു ചിന്തിക്കാനാവുമായിരുന്നില്ല.    “മറിയ കല്ലറക്കല്‍ കരഞ്ഞുകൊണ്ട് നിന്നു.”

മറിയത്തിന്‍റെ സ്നേഹത്തിന്‍റെ കാത്തുനില്‍പ്പിന് കര്‍ത്താവ് നല്‍കിയ പ്രതിഫലം വലുതായിരുന്നു. ഉയിര്‍ത്തെഴുന്നേറ്റ കര്‍ത്താവ്, ആദ്യമായി പ്രത്യക്ഷപ്പെട്ടത് മഗ്ദലക്കാരി മറിയത്തിനാണ് (മര്‍ക്കൊ 16: 9)   ഉയിര്‍പ്പിന്‍റെ സന്ദേശം അപ്പൊസ്തലന്മാരെത്തന്നെ അറിയിക്കുവാന്‍ കര്‍ത്താവ് തിരഞ്ഞെടുത്തതും മഗ്ദലനക്കാരി മറിയത്തെ ആണ്  എന്നത് വിസ്മയകരമാണ്.  സെന്‍റ് അഗസ്റ്റിന്‍ ഇതുസംബന്ധിച്ച്  എഴുതുമ്പോള്‍ “അപ്പൊസ്തലന്മാരുടെ അപ്പൊസ്തല” എന്നാണ്  മഗ്ദലനക്കാരി മറിയത്തെ വിശേഷിപ്പിച്ചിരിക്കുന്നത്.”മുന്‍പന്മാര്‍ പലരും പിന്‍പന്മാരും, പിന്‍പന്മാര്‍ പലരും മുന്‍പന്മാരും ആകും” എന്ന കര്‍ത്താവിന്‍റെ വാക്കുകള്‍ മറിയത്തിന്‍റെ കാര്യത്തിലും അന്വര്‍ത്ഥമായി. “മുമ്പെ അവിടുത്തെ രാജ്യവും നീതിയും അന്വേഷിക്കുവിന്‍.” ലോകത്തിന് നല്‍കാന്‍ കഴിയാത്ത നന്മകള്‍ മറിയത്തിന് എന്നപോലെ കര്‍ത്താവ് നമുക്കായും കരുതി വെച്ചിട്ടുണ്ട്. 

തടസങ്ങളെ നോക്കി മറിയം നിരാശപ്പെട്ടില്ല. കര്‍ത്താവിനെ ആലേപനം ചെയ്യുവാന്‍ സുഗന്ധവര്‍ഗ്ഗവുമായി പോകുമ്പോഴും ഒരു ചോദ്യം മറിയത്തിന്‍റെയും മറ്റു സ്ത്രീകളുടെയും മനസ്സില്‍ ഉണ്ടായിരുന്നു, “ആര്‍ നമുക്കു വേണ്ടി കല്ലു ഉരുട്ടിക്കളയും?”. രണ്ടുമൂന്നു സ്ത്രീകള്‍ വിചാരിച്ചാല്‍ മാറ്റവുന്ന കല്ലായിരുന്നില്ല കല്ലറയുടെ വാതില്‍ അടയ്ക്കുവാന്‍ ഉപയോഗിച്ചിരുന്നത്. “ചെയ്യുവാന്‍ മനസ്സുണ്ടെങ്കിലും പോയിട്ടു കാര്യമില്ല” എന്ന് നെടുവീര്‍പ്പിട്ടു വീട്ടിലിരുന്നെങ്കില്‍ മനുഷ്യ വര്‍ഗ്ഗത്തിന്‍റെ മുഴുവന്‍ പ്രതീക്ഷാനാളമായി തുറന്ന ക്രിസ്തുവിന്‍റെ ഒഴിഞ്ഞ കല്ലറ ആദ്യമായി കാണുവാനുള്ള ഭാഗ്യം മറിയത്തിനു ലഭിക്കുമായിരുന്നില്ല. 

കര്‍ത്താവിനെ സ്നേഹിക്കുവാന്‍, ശുശ്രൂഷിക്കുവാന്‍ പലവിധ തടസങ്ങള്‍ നമ്മുടെ മുന്നില്‍ ഉണ്ടായിരിക്കാം. സഭായോഗവും ക്ലാസ്സുകളും പ്രാര്‍ത്ഥനാമീറ്റിംഗുകളും സുവിശേഷവേലയും ഒക്കെ ഒഴിവാക്കുന്നതിന് എന്തെല്ലാം തടസ്സങ്ങളാണ്  നമുക്കുള്ളതായി തോന്നുന്നത്. സത്യത്തില്‍  എറ്റവും വലിയ തടസ്സം നമ്മുടെ മനസ്സിലെ അവിശ്വാസം തന്നെയാണ്. ഉരുട്ടിമാറ്റേണ്ടത് പുറമെയുള്ള കല്ലുകളല്ല, നമ്മുടെ തന്നെ ഹൃദയത്തിലെ ഒഴിവുകഴിവുകളാകുന്ന കല്ലുകളാണ്. 

അനാക്യ മല്ലന്മാരെ ഭയപ്പെട്ടിരുന്നുവെങ്കില്‍ യോശുവയ്ക്കും കാലേബിനും വാഗ്ദത്തദേശം കൈവശമാക്കുവാന്‍ കഴിയുമായിരുന്നില്ല. ഗോലിയാത്തിന്‍റെ വലിപ്പവും യുദ്ധമികവും ന്യായമായി കണ്ടിരുന്നു എങ്കില്‍ ദാവീദിനു യിസ്രായേല്‍ ജനത്തെ വിജയത്തിലേക്കു നയിക്കുവാന്‍ കഴിയുമായിരുന്നില്ല.  തടസ്സങ്ങളെ നോക്കി നിരാശപ്പെട്ടിരിക്കാതെ പ്രത്യാശയോടെ മുന്നോട്ടു പോകാം. കല്ലുകള്‍ ഉരുട്ടിമാറ്റാന്‍ ദൈവം ദൂതന്മാരെ നിയോഗിച്ചിട്ടുണ്ട്.

മരിക്കാത്ത സാക്ഷ്യം

ഏഴു ഭൂതങ്ങള്‍ ബാധിച്ച്, ആര്‍ക്കുംവേണ്ടാതെ കിടന്ന പാഴ്ജന്മമായ മഗ്ദലക്കാരി മറിയം കര്‍ത്താവിന്‍റെ ഉയിര്‍പ്പിനും കര്‍ത്താവു നല്‍കുന്ന വിടുതലിനും സാക്ഷിയായി ജീവിതം സമര്‍പ്പിച്ചു. കര്‍ത്താവിന്‍റെ സാക്ഷിയായി ജീവിക്കുക എന്നത് പുരുഷന്മാര്‍ക്കു മാത്രമായി കര്‍ത്താവു മാറ്റിവച്ചിട്ടുള്ള ഉത്തരവാദിത്വമല്ല. കര്‍ത്താവിന്‍റെ വീണ്ടെടുപ്പും അവിടുത്തെ സ്നേഹവും അനുഭവിച്ച എല്ലാ സ്ത്രീകളും മഗ്ദലക്കാരി മറിയത്തെപ്പോലെ, കര്‍ത്താവിന്‍റെ സാക്ഷികളായി ജീവിക്കേണ്ടവര്‍ തന്നെയാണ്. 

തീര്‍ത്തും ശുഭകരമല്ലാത്ത ജീവിതപശ്ചാത്തലമുള്ള ഒരു സ്ത്രീയ്ക്ക് മറിയം എത്തിയ മഹത്വപൂര്‍ണ്ണമായ സ്ഥിതിയില്‍ എത്തുക എളുപ്പമല്ല. എന്നാല്‍ അത് അസാധ്യമല്ല എന്ന് മറിയം തെളിയിച്ചു. വാസ്തവത്തില്‍ മറിയത്തിന്‍റെ ശ്രേഷ്ഠതയെക്കാള്‍ മനസ്സില്‍ വരുന്നത്, മഗദദേശത്തിന്‍റെ തെരുവീഥികളിലൂടെ ഭൂതബാധിതയായി അലഞ്ഞു നടന്ന, പരിഹാസപാത്രമായിരുന്ന, ദുരിതപൂര്‍ണ്ണയായിരുന്ന മറിയത്തെ കര്‍ത്താവിന്‍റെ സാക്ഷിയും സ്ത്രീകള്‍ക്കു മാതൃകയുമായി രൂപാന്തരപ്പെടുത്തിയ ദൈവത്തിന്‍റെ അപാരമായ കൃപമഹത്വമാണ്. നമ്മുടെ ജീവിതങ്ങളെയും  അതിശയകരമായി രൂപാന്തരപ്പെടുത്തുവാന്‍ ദൈവത്തിനു കഴിയും.